لەم رۆژانە تۆرێکی پێشانگای تایبەتی وێنەییم دەبێت لە وڵاتی ئەمەریکا کە بە هەوڵ و ماندووبونێکی زۆری هاورێیانم لە رێکخراوی رۆحی ئەمەریکا و نوێنەرایەتی حکۆمەتی هەرێم لەم وڵاتە دێتە ئارا و جێگەی رێز و پێزانینی بێ پایانە

وێنەکانی ئەم پێشانگایە لە سێ بەشی جیاواز پێکدێت

بەشی یەکەم باسی شەری داعش و بەرگری هێزی پێشمەرگەی کوردستان و قوربانی دانیان دەکات لە پێناو خاکی پیرۆزی کوردستان

 بەشی دووەم باسی ژیان و ناساندنی کورد و کوردستان دەکات

بەشی سێیەم باسی ژیان و بارودۆخی پێشمەرگە بریندارەکانی شەری دژ بە داعش دەکات

یەکەم پێشانگام لە شاری نەشڤیل دەبێت کە ناسراوە بە کوردستانی بچوک و نیشتیمانیەکی زۆری کورد نیشتەجێی ئەم شارەن و مایەی شانازییە کارەکانم لە نزیکەوە دەکەوێتە بەرچاویان

دووم پێشانگام لە کۆنگرێسی ئەمریکا و لە شاری واشنگتۆن دەبێت و زۆر خۆشحالم بەوەی بۆ جاری دووەم وێنەکانم لەناو کۆنگرێسی ئەمریکا و بۆ کەسانی تایبەت پیشان دەدرێت

سێیەم پێشانگام هەر لە شاری واشنگتۆن و لە باڵەخانەی نوێنەرایەتی حکومەتی هەرێمی کوردستان دەبێت کە هەلبەت چەندین جاری تریش وێنەکانم لەوێ پیشاندراوە و مایەی شانازییە

دیسانەوە سوپاسی هەموو ئەو کەسانە دەکەم کە لە پێناو رێکخستنی ئەم پێشانگایانە ماندووبون و هاوکارییان کردووم

هیوادارم ئەم کارە جێگەی رەزامەندی هەموو لایەک بە تایبەت پێشمەرگە بریندارەکان شەری دژ بە داعش بێت کە مایەی سەربەرزی هەموو کوردستانن

ئەنستیتیوتی فەڕەنسی لە هەولێر و یانەی سینەمای هونەری لاوانی دهوک بە خۆشحاڵییەوە بانگهێشتتان دەکەن بۆ پێشانگای فۆتۆگرافی لەژێر ناوی “نیگای یەکتربڕ”

لە وێنە نمایشکراوەکاندا، کۆمەڵەی یانەی سینەمای هونەری لاوانی دهوک ئاشنامان دەکەن بەم شارە. یاری بە گۆشەکان دەکەن و دەتبەنە بەر ڕەنگدانەوەی گواستنەوەی نەریت و مۆدێرنیزم لە ڕێگەی دیمەنە جیاوازەکانی ژیانی ڕۆژانەی دانیشتوانی دهۆکەوە

گەیلان ئیسماعیل لە ئینستێلاسیۆنی هونەریدا دیدێکی دیکەتان پێشکەش دەکات سەبارەت بە کارەساتێکی دیکەی مۆدێرن، کە ئەویش کۆچبەرییە

ئەم یەکگرتنە ئاوێتە کردنی وێنە و ئینستێلاسیۆنی هونەرییە

کردنەوەی ئەم چالاکییە لە ڕۆژی یەکشەممە ٢٠٢٣/٦/٤ کاتژمێر ٥:٣٠ی ئێوارە بەڕێوەدەچێت

دواتر بەرهەمەکان لە ئەنستیتیوتی فەڕەنسی لە هەولێر تا ٢٠٢٣/٧/٣١ نمایش دەکرێن

بە خۆشحالی و شانازییەوە یەکێک بووم لە ئەندامانی لێژنەی دادوەری کێبرکێیەکی فۆتۆگرافی هونەری کە ئەمە دووەم پێشانگایە بۆ وێنەکانی هەلبژێردڕاو دوای ئەوەی لە ئاداری ئەمسال یەکەم پێشانگا لە دهۆک بەرێوەچوو

هونەرمەندی کورد، سەربازی ونی نیشتیمانە

چەند رۆژ لەمەوبەر لە لایەن بەرێوەبەران و جێبەجێ کارانی پێشانگای “کوردستان - ڕووخساڕە ڕزگار کراوەکان” کە لە مۆزەخانەی شاری بیدگۆشچی پۆلەندا بەرپا کرابوو، نووسراوێک ئاراستەی من و دیارە سەرجەم هونەرمەندە کوردە بەشداربووانی پێشانگایەکە کرا کە وێرای سوپاسیان، لە کۆتایی پێ هاتنی پێشانگاکە کە زیاتر لە چوار مانگی خایاندبوو، ئاگادار کراین، نووسینەکەیان ئەوەندە بەهێز و بەرێزەوەیە کە مرۆڤ هەست دەکات کاتی بەفێرۆ نەدابوو و ئەرکی بە جێگەیاندووە

کیورەیتۆری ئەم چالاکییە هونەرییە لە نوسراوەکەیدا دەلێ

بە خۆشحاڵییەکی زۆرەوە دەبێ ئاماژە بەوە بکەم کە کارکردن لەگەڵ ئێوە ئەزموونێکی نایاب بوو، ئەو پێشانگایە هێزی کولتوور و هونەری کوردی و توانای ڕادەبەدەری هونەرمەندی کورد لە بنیاتنانی فەزای هونەری جیهانیدا، بە بینەرانی پۆڵەندی و بیانی نیشان دا. لەو رێگەیەوە دەرفەتی ئەوەمان بۆ ڕەخسا کە لە ئیرادەی بەردەوامی گەلی کورد و خەباتی بۆ بەدەوڵەتبوونی خۆی و ئەو دراما ئینسانی و کۆمەڵایەتیانەی پەیوەستن بە ئیرادەی بوونی وەک پێکهاتەیەکی سەربەخۆوە بزانین

ئەم چەند رەستەیەم لە هیچ هاونیشتیمانیەکی خۆم گوێ لێ نەبووە، ئەو بەها و نڕخم لە هەلسوکەوتی هیچ هاولاتیەکی خۆم گوێ لێ نەبووە، لە ولاتی خۆم هونەر وەک ئەوەی داماو و پاشکۆ بێت سەیر دەکرێت و هێزەکەی نابینرێت

(هیوادارم بەپێچەوانەی من هونەرمەندانی تری کورد ئەم رەستانەیان زۆر بیستبێ)